Nuk ndalet përplasja mes Prokurorisë dhe Policisë. Një përplasje që ka nisur që nga arrestimi i Emiljano Shullazit, veprim që ministri i Brendshëm Saimir Tahiri duket se nuk ia ka falur Prokurorisë.
Përplasja mes dy institucioneve është bërë më e madhe gjatë operacioneve të fundit anti-kanabis.
Operacionet më të mëdha antikanabis, ku sasia e hashashit e asgjësuar është tepër e madhe, janë organizuar nga Prokuroria e Krimeve të Rënda, në bazë të informacioneve të marra nga SHISH dhe jo nga policia.
Kështu aksionet në Dibër, Vlorë e Ishëm kanë prapa nxitjen s prokurorisë. Në Vlorë u zbulua se një efektiv i policisë ishte pronar i dy parcelave me kanabis.
Bëhet fjalë për efektivin Renaldo Avduli, oficeri i sektorit kundër krimit ekonomik, i cili është njoftuar për arrestimin nga kolegët e tij.
Të njëjtat burime pohuan për Gazeta Shqiptare se Avduli dhe dy bashkëpunëtor e tij, kontrollonin veprimtarinë kriminale përmes fotove që u dërgonin punëtorët e kanabisit.
Tashmë, Avduli është shpallur në kërkim, ndërsa ndaj tij është caktuar në mungesë edhe masa e sigurisë ‘Arrest me burg’
