Federata e Futbollit të Kosovës (FFK) ka përgënjeshtruar lajmin se UEFA ka kërkuar dorëheqjen e Agim Ademit nga posti i presidentit.
Në deklaratën zyrtare të FFK-së të shpërndarë dhe në rrjetet sociale, thuhet se lajme të tilla kanë për qëllim destabilizimin e Federatës. “Gazeta Metro” raportonte ditën e sotme se UEFA i kishte dërguar shkresë FFK-së ku kërkohej shkarkimi i Ademit, për shkak se ai ishte dënuar nga Gjykata e Prishtinës me 9 muaj burg për shantazh me qëllim të përfitimit material.
Megjithatë në reagimin e bërë, Ademi i përgënjeshtron këto lajme duke thënë: “Vazhdimisht kam qenë dhe jam në kontakt të drejtpërdrejt me organet e UEFA-s dhe çdo herë jam konsultuar për rastin tim gjyqësor dhe UEFA në çdo hap ka qenë e informuar mbi ecurinë e procesit.
Përkundër faktit se kam e ndje veten të pafajshëm gjithmonë kam besuar në drejtësi dhe për këtë arsye e kam kërkuar të drejtën time legjitime deri në instancën e fundit gjyqësore, me ç’rast jam duke e pritur vendimin përfundimtar. Për këtë është e informuar edhe UEFA, e cila asnjëherë nuk ka kërkuar dorëheqjen time.”
