Një 47 vjeçar shqiptar është ekstraduar në Itali, pas një kërkimi prej 20 vjetësh nga autoritetet, pasi akuzohet për vrasje.
Luan Vrapi akuzohet si i autor i vrasjes së 22-vjeçarit shqiptar Hyso Telharaj, ngjarje e ndodhur më 8 shtator të vitit 1999 në Foggia.
I arratisuri, u gjurmua falë bashkëpunimit të shpeshtë dhe të konsoliduar midis policisë shqiptare dhe zyrës së ekspertit italian të sigurisë që operon në Tiranë. Pasi përfundoi në aeroportin e Romës, ai iu dorëzua autoriteteve të burgut në pritje të vendimit të mëtejshëm të gjykatës.
Emri i Hysos është bërë simbol kundër shfrytëzimit në punë dhe në 20 vjetorin e vdekjes, në shtator 2019, shoqata “Libera” organizoi tri ditë kujtese me titull “Buzëqeshja e ëmbël e Hyso Telharaj”.
I riu kishte shkuar në Itali për të kërkuar punë dhe kishte përfunduar si punëtor në bujqësi në Capitanata. Hyso ishte 22 vjeç kur u përpoq të rebelohej kundër korporatave, duke paguar me jetën e tij refuzimin për t’u dhënë atyre një pjesë të fitimeve të tij.
“La Stampa” shkruante se i riu u vra në një vilë në periferi të Borgo Incoronata nga një komando e armatosur. Disa miq u përpoqën ta paralajmëronin për rrezikun, por ai, zgjodhi të mos ikte. Ai u rrah, pastaj u qëllua për vdekje me nëntë plumba. Kushëriri i tij – i cili kishte mbërritur në Puglia dhe ishte me të – u ndalua.
