Liverpooli ka shkatërruar 4-0 skuadrën e Crystal Palace në ndeshjen e luajtur në “Anfield”.
Pas barazimit me Everton tre ditë më parë, skuadra e Jurgen Klopp ka reaguar menjëherë duke arritur një fitore bindëse. Liverpool shënoi nga dy herë në çdo pjesë duke mos hasur në aspak rezistencë nga miqtë.
Trent Alexander-Arnold shënoi golin e parë të sfidës në minutën e 23-të për “Të Kuqtë”. Mbrojtësi anësor anglez realizoi gol të jashtëzakonshëm nga goditja e dënimit. Më pas në minutën e 44-t ishte radha e Salah të gjente rrugën e rrjetës. Egjiptiani ka marrë një pasim perfekt nga Fabinho dhe ka dërguar topin në rrjetë me lehtësi.
Më pas në pjesën e dytë, Fabinho dhe Mane vulosën rezultatin përfundimtar 4-0 me golat e tyre përkatësisht në minutën e 55’ dhe 69’.
Tashmë titulli për Liverpool-in është thjesht një formalitet pasi në 7-të ndeshjet e radhës “Të Kuqtë” duhet të marrin vetëm 2 pikë, gjithmonë nëse City do t’i fitonte të gjitha ndeshjet e mbetura.
