Ish-kryeministri Sali Berisha, ka reaguar pas deklaratave të forta të eurodeputetëve, të cilat kritikuan qeverinë. Në një postim në rrjetet sociale, Berisha deklaron se sot në PE u denoncua dobësia e madhe e kryeministrit Edi Rama për trafikantët e drogës. Ish-kreu i PD-së përmend deklaratën e eurodeputetit David Lega, i cili tha se Rama tregohet i ashpër me gazetarët dhe i butë me trafikantët.
“Ky është defakto edhe denoncimi i narkoshtetit shqiptar në tempullin e demokracisë europiane! “Edvini tregohet shumë i ashpër me gazetarët dhe shumë i butë me trafikantët”! Ky është denoncimi historik i narkoshtetit shqiptar nga deputeti i Parlamentit Europian David Lega.
Me këtë deklaratë në seancën e Komisionit të Jashtëm të Parlamentit, Lega denoncoi publikisht dhe botërisht dobësinë e madhe, pra lidhjet së paku shpirtërore të narkokreut të narkoshtetit Edvin Ramës për trafikantët dhe armiqësinë e tij të egër ndaj gazetarëve sepse i denoncojnë këto lidhje”, shkruan Berisha në rrjetet sociale.
