Agjencia e vlerësimit të kreditit, Moody’s, bëri të ditur se koronavirusi do të rrisë mesatarisht nivelet e borxhit në vendet më të pasura të botës me 20% këtë vit, thuajse sa dyfishi krahasuar me krizën financiare të vitit 2009. Raporti i ri i Moody’s mori në studim 14 vende, nga Shtetet e Bashkuara e Japonia e deri tek Italia e Britania dhe vlerësoi se si ngadalësimet ekonomike të shkaktuara nga koronavirusi do të lënë shenjë tek financat e tyre.
“Vlerësojmë se në këtë grup, nivelet e borxhit në raport me PBB do të rriten mesatarisht me 19%, thuajse sa dyfishi i dëmit nga kriza financare e vitit 2009”, deklaroi Moody’s. Italia, Japonia dhe Britania, pritet të pësojnë rritjen më të madhe të borxhit, në rreth 25% të ekonomive të tyre, ndërsa SHBA, Franca, Spanja, Kanadaja dhe Zelanda e Re, do të shohin një rritje me rreth 20%. Të dhënat nga Mbretëria e Bashkuar javën e kaluar treguan se huamarrja publike kishte prekur nivel rekord në muajin Maj dhe treguesi i borxhit të sektorit publik kaloi 100% të prodhimit ekonomik.
Dështimi për të ulur nivelet e borxhit do të përkeqësojë profilet e vendeve, duke i lënë më të cënuara ndaj krizave të ardhshme financiare dhe me shumë mundësi, duke sjellë zhvlerësime të kreditit, sipas Moodys. “Pasojat tek notat e vendeve do të varen tek aftësia e qeverive për të ruajtur trajektoret e borxhit përpara goditjeve të mundshme në të ardhmen”, thekson Moody’s./SCAN
