Policia e Durrësit ka ushtruar kontrolle në zonën bregdetare kundër zaptimit të pronës publike. Si rezultat janë arrestuar dy administratorë të një subjekti, pasi kanë kundërshtuar punonjësin e Policisë, si dhe është proceduar në gjendje të lirë një tjetër, për pushtim toke.
“Shërbimet e Stacionit të Policisë Plazh, konstatuan 2 subjekte që kishin zaptuar hapësirën publike (plazh), duke vendosur çadra dhe shezlongë pa lejen e autoriteteve përkatëse. Gjatë veprimeve të kryera nga punonjësit e Policisë u arrestuan shtetasit: F. N., 51 vjeç dhe K. N., 56 vjeç, banues në Shijak, Durrës (administratorë të një subjekti), pasi kanë kundërshtuar punonjësin e Policisë. Gjithashtu u procedua në gjendje të lirë shtetasi A. M., 32 vjeç, pasi u konstatua se përpara subjektit të tij kishte vendosur çadra dhe shezlongë pa lejen e autoriteteve përkatëse.” thuhet në njoftimin e policisë
Nga Policia bashkiake për të dy subjektet u vendos masë administrative.
Materialet i kaluan Prokurorisë së Rrethit Gjyqësor Durrës, për veprat penale “Kundërshtimi i punonjësit të policisë” dhe “Pushtimi i tokës”.
