Shefja e Departamentit të Epidemiologjisë, Silva Bino, shprehet se rritja e numrit të infektimeve me COVID-19 në ditët e fundit ka ardhur për shkak të moszbatimit të masave nga qytetarët dhe institucionet.
Gjatë një interviste për OraNews ajo deklaroi se qytetarë menduan se virusi iku, por një shkelje sado e vogël e masave sjell përhapjen e virusit.
”Kemi të bëjmë me një rritje të koronavirusit në Shqipëri. Këtë e tregon edhe numri i rasteve. Shumë nga rregullat e parandalimit të infeksionit nuk janë zbatuar. Kjo është edhe një nga arsyet pse në disa nga institucionet publike apo private, kemi pasur raste me koronavirus.
Kjo ka ardhur si pasojë e mosrespektimit të masave të kontrollit të infeksionit. Kur flasim për masat e kontrollit të infeksionit ato nuk janë vetëm për institucionet shëndetësore, por kanë të bëjnë me të gjitha llojet e institucioneve. Protokollet janë shumë të qarta për këtë gjë. Shpesh herë njerëzit i neglizhojnë”, tha Bino.
Sipas saj, në maj pati një numër shumë të pakët të rasteve dhe një pjesë e mirë e njerëzve menduan se koronavirusi iku, por koronavirusi ka qenë aty.
Gjatë ditës së sotme, Ministria e Shëndetësisë deklaroi 82 raste me Covid-19, që përbën edhe shifrën më të lartë për Shqipërinë prej datës 9 mars kur u zbulua zyrtarisht rasti i parë me koronavirus.
