Nga BoldNews.al
Prokuroria e Posaçme, SPAK, pritet të shqyrtojë një kallëzim ndaj gjyqtarit të Fierit, Ergys Selmani, i akuzuar nga biznesmeni Zigur Bejkosala për “shpërdorim detyre”, me pasoja të rënda mbi aktivitetin e tij financiar.
“Boldnews.al” ka mësuar se biznesmeni nga Vlora ka dorëzuar kallëzimin në SPAK, pasi pretendon se gjyqtari Selmani ka vendosur sekuestro mbi të gjitha pasuritë e tij, në kundërshtim të plotë me ligjin.
Kallëzuesi Bejkosala hedh dyshimet se vendimi i gjyqtarit mund të jetë ndikuar nga interesa korruptive.
Për të mbështetur dyshimet e tij, biznesmeni i referon prokurorëve të SPAK-ut se gjyqtari Selmani është takuar në zyrën e tij në gjykatë, në orët e vona të mbrëmjes, një ditë para shpalljes së vendimit, me avokatin e palës kundërshtare, Luan Shabani
Gjithçka lidhet me një detyrim financiar që Bejkosala i ka shoqërisë “I…” shpk.
Konflikti gjyqësor
Në Prill 2019, Zigur Bejkosala, administrator i kompanisë “Casaviva” lidh një kontratë me kompaninë “I…”shpk, në bazë të të cilës kallëzuesi merr me qera një ambjent në një qendër tregtare në Fier.
Në Qershor 2020, Bejkosala i detyrohet kompanisë “I…”shpk, shumën prej 792 mijë lekë (të reja).
Çështja e detyrimit financiar shkon në gjykatë, ku pala paditëse “I…”shpk kërkon kthimin e shumës.
Çështja shqyrtohet nga gjyqtari i Fierit, Ergys Selmani. Ky i fundit, me një vendim për caktimin e sigurimit të padisë, vendos sekuestrimin e pasurive dhe kredive të kompanisë “Casaviva” në shumën 792 mijë lekë.
Gjyqtari vendos gjithashtu edhe bllokimin e shumës 792 mijë lekë, të cilat gjendeshin në një llogari bankare të kompanisë “Casaviva”.
Por, nuk mjaftohet me kaq. Gjyqtari Selmani vendos pezullimin e aktivitetit të kompanisë “Casaviva” të biznesmenit Zigur Bejkosala, si edhe kthimin e sendit, pra dyqanit me qera, në favor të “I…”shpk.
Për kallëzuesin Bejkosala, vendimi i gjyqtarit ka tejkaluar të gjithë limitet, duke dalë edhe përtej kërkesës së paditësit, “I…”shpk, i cili kërkon kthimin e detyrimit.
Sipas tij, gjyqtari Selmani e ka shqyrtuar rastin në themel, ndërkohë që detyra e tij ishte vetëm shqyrtimi i kërkesës për sigurimin e padisë.
Për kallëzuesin, objekt gjykimi ishte vetëm kthimi i shumës së detyrimit. Ndërkohë që gjyqtari Selmani, me vendimin e tij, ka urdhëruar pezullimin e aktivitetit dhe, mbi të gjitha, edhe mbylljen e tij, kur ka vendosur që kompania “Casaviva” të dorëzojë objektin e punës (dyqanin).
“Shpërdorim detyre”
Përballë këtij vendimi, të cilin biznesmeni Bejkosala e konsideron absurd, atij nuk i mbeti gjë tjetër veçse të dorëzonte një kallëzim penal ndaj gjyqtarit.
Në kërkesën që i ka drejtuar SPAK, biznesmeni, krahas paraqitjes së fakteve mbi vendimin e gjyqtarit Selmani, jep edhe një detaj, për të cilin ngre dyshime se përbën sfond korruptiv.
“Unë kallëzoj gjyqtarin Ergys Selmani, për veprën penale shpërdorim detyre. Gjyqtari është shoqëruar me avokatin Luan Shabani dhe në orarin e mbrëmjes është futur në gjykatë, duke hartuar në Këshill një vendim në shpërdorim të të gjitha kompetencave dhe detyrës që ka një Gyqtar”, shkruan Bejkosala në kallëzimin e tij.
Në vijim, kallëzuesi shkruan se “mendoj se takimi i gjykatësit në orët e vona të mbrëmjes me avokatin Luan Shabani është bërë me qëllim korrupsioni”.
