Inspektoriati Shtetëror Shëndetësor ka paralajmëruar bizneset të respektojnë masat mbrojtëse, duke përdorur doreza dhe maska, lidhur me koronavirusin.
Ndërsa këshillon zbatimin e protokolleve, drejtorja e Inspektoriatit Shëndetësor, Vjollca Braho, apelon subjektet të mos ulin vigjilencën. Sipas saj, asnjë prej subjekteve nuk do të tolerohet në shkeljet që do të evidentohen.
“Ne kemi qenë në terren në të gjitha këto subjekte, por shikojmë një shkujdesje nga ana e subjekteve për masat mbrojtëse, siç janë maskat dhe dorezat. Ne i kemi këshilluar këto subjekte, por nga dita e sotme toleranca jonë do jetë zero dhe do ndëshkohet çdo subjekt që nuk i zbaton këto masa.
Iu bëj thirrje të gjitha subjekteve për marrjen e këtyre masave për të parandaluar përhapjen e Covid19,” shprehet Braho.
Inspektoriati Shtetëror Shëndetësor ka kryer deri më tani 67320 inspektime për të parandaluar përhapjen e Covid 19, si dhe ka vendosur 205 masa administrative ndaj atyre subjekteve, të cilat kanë qenë në shkelje të protokolleve të miratuara nga Ministria e Shëndetësisë.
