Mbrëmjen e djeshme u ekzekutua në Tiranë 40-vjeçari Hekuran Billa, person me precedent penalë, i akuzuar dhe dënuar për vrasje të kryer në vitin 2006.
Krimi ka ndodhur në zonën e “Komunës së Parisit”, ndërsa Bill u qëlluar me një armë MP5, e cila nuk rezulton e regjistruar në Shqipëri.
Billa ishte duke udhëtuar me automjetin e tij, kur u qëllua me breshëri.
Policia ka gjetur në vendin e ngjarjes mbi 30 gëzhoja, dhe më vonë në zonën e Prezës së Vogël, pak kilometra nga vendi i ngjarjes, u njoftua për një automjet të djegur, duke ngritur dyshimet se ai është mjeti i përdorur nga autorët e ngjarjes.
Dyshimet janë se vrasja mund të jetë kryer nga ekzekutorë me pagesë, ndërsa pista ku po hetohet është ajo e hakmarrjes. Gjithsesi burime policore shprehen se po hetohen edhe pista të tjera.
Sipas burimeve, autorët duket se e kanë mbajtur viktimën nën mbikqyrje, pasi ai është qëlluar sapo ka dalë nga një lokal ku kishte konsumuar kafe dhe kishte hipur në automjetin e tij, i cili rezulton i paregjistruar në Shqipëri.
Viktima prej disa kohësh kishte hapur një aktivitet të dhënies së automjeteve me qira.
