Vrasja e biznesmenit Bujar Nasufi tek “Pallati me Shigjeta” në kryeqytet vijon të mbetet ende pa një autor. Bëhet me dije se familjarët e tij janë marrë sërish në pyetje. Ata janë shprehur se nuk kanë dijeni për konfliktet që ai mund të ketë pasur.
Gjatë dëshmisë së tyre, raportohet se ata janë shprehur të rezervuar kur janë pyetur mbi problemet qe ata mund të kenë me bizneset apo pronat. Ndërkohë, telefoni i viktimës është dërguar për ekspertim në policinë shkencore ku pritet të marrin prej saj komunikime të vlefshme.
Një ditë më parë, në ambientet e një tuneli të braktisur nga ushtria në zonën “Kodrat e Sharrës”, policia gjeti të shkrumbuar motorin që dyshohet se është përdorur nga autori i kamufluar si shpërndarës picash. Përveç motorit të djegur është gjetur dhe arma e krimit një automatik i shkurtër MP5.
Deri tani, pista kryesore e hetimeve është ajo e konflikteve për pronat me familjarët. Sipas informacioneve, familja Nasufi me origjinë nga Berati, jetojnë prej shumë vitesh në zonën e Selitës së vogël. Pesë vëllezërit e kësaj familjeje, janë pronarë të disa bizneseve në rrugën “Irfan Tomini”. Familjarët kanë deklaruar se pronat janë ndarë që herët dhe s’ka pasur probleme mes vëllezërve. Fqinjët e viktimës kanë deklaruar gjithashtu se biznesmeni ka qenë person i qetë, nuk kishte konflikte dhe bënte një jetë normale.
