Maturantët janë ftuar sot të protestojnë para Ministrisë së Arsimit lidhur me provimet e maturës shtetërore. Protesta e njoftuar përmes rrjeteve sociale një ditë më parë, pritet të nisë në orën 11:00, ndërsa maturantëve i kërkohet të bashkohen për tre kërkesa.
Mundësi për rivlerësimin e provimeve, ulja e katofit të vlerësimit dhe mosvlerësimin e pyetjeve jashtë programit, janë 3 kërkesat që maturantët kanë ndaj Ministrisë së Arsimit.
Deri më tani maturantët i janë nënshtruar dy provimeve të maturës shtetërore, ndërsa prej marsit deri në 5 qershor kanë zhvilluar mësime online për shkak të mbylljes së shkollave për shkak të pandemisë së Covid-19.
Ministria e Arsimit ka njoftuar më parë se korrigjimi i testeve të provimeve do të bëhet online, për të shmangur kështu grumbullimet e mësuesve.
Maturantët i janë nënshtruar provimit të matematikës dhe gjuhë shqipe dhe letërsi, ndërsa një ditë më parë u denoncua skandali i rrjedhjes së tezës së provimit.
