Një bandë italo-shqiptare është goditur nga një bashkëpunim mes autoriteteve policore italiane dhe atyre shqiptare. Mbi dhjetë persona u arrestuan në shtetin fqinjë ndërsa u sekuestruan mbi 4 ton marijuanë, armë zjarri, 0.5 kg kokainë, gomone etj.
Grupi, sipas hetuesve, trafikonte sasi të konsiderueshme droge nga Shqipëria në Itali përmes detit.
Aksioni
Burime zyrtare nga policia shqiptare bënë me dije se: Si rezultat e një bashkëpunimi të konsoliduar mes strukturave policore shqiptare dhe italiane, u bë i mundur realizimi i një operacioni të gjerë antidrogë, në kuadër të të cilit u arrestuan 17 shtetas ditën e sotme në Itali, 4 prej tyre shqiptarë, të tjerët italianë, që bënin pjesë në një rrjet trafiku ndërkombëtar narkotikësh.
Në total janë 32 persona të proceduar, ndërsa hetimet kanë nisur që në vitin 2017, pasi në brigjet italiane, u kapën sasi të mëdha marijuane dhe në përfundim të hetimeve u lëshuan urdhër ndalimet për pjesëtarët e rrjetit, rezidentë në disa qytete të Italisë.
Si prova materiale u kapën dhe sekuestruan mbi 4 ton marijuanë, 0.5 kg kokainë, 27 mijë euro, 1 gomone, 3 autovetura, armë zjarri e sende të tjera me vlerë për hetimin.
Personat e arrestuar vepronin si organizatë e strukturuar kriminale dhe kryenin transportin, magazinimin, shpërndarjen, shitjen e drogës nëpër qytete të ndryshme të Italisë e kryesisht në veri të këtij vendi.
Operacioni për arrestimin e të kërkuarve i koduar “Beached”, u zhvillua gjatë natës së djeshme dhe ditës së sotme dhe në të u angazhuan njësi të ndryshme të strukturave ligjzbatuese italiane, në bashkëpunim me strukturat e Policisë Shqiptare në një bashkërendim operativ mes të dy palëve.
Kush janë të arrestuarit
Lidhur me aksionin kanë raportuar dhe mediat italiane, që kanë zbardhur edhe emrat e personave të vënë në pranga.
Shqiptarët e arrestuar janë:
- Benard Blushaj, 42 vjeç
- Zaimir Dharda, 36 vjeç,
- Amarildo Troqe, 30 vjeç,
- Klajdi Ymeri, 39 vjeç,
- Kreshnik Hoxha, 32 vjeç.
/BoldNews.al/
