Mësuesi i cili në fillim të këtij marsi dhunoi në mënyrë çnjerëzore nxënësit e tij është liruar nga Gjykata e Dibrës, e cila vendosi t’i japë masën e sigurisë të “arrestit shtëpiak”.
Kështu Agim Muça do të duhet të presë në arrest shtëpie, jashtë hekurave të qelisë vendimin për akuzat që rëndojnë ndaj tij. Më 4 mars Muça, dhunoi me dru zjarri nxënësit e shkollës 9-vjeçare të Orzhanovës në fshatin Ostren, katër pre të cilëve përfunduan në spital për të marrë mjekim.
Pas ngjarjes, prindërit e nxënësve deklaruan se mësuesi kishte përdorur edhe më parë dhunën dhe se ishin ankuar tek drejtuesit e shkollës por nuk ishte marrë asnjë masë.
Nga ana tjetër Gjykata ka arsyetuar se nuk ka prova për fajësinë e tij dhe për këtë qëllim e ka dhënë masën arrest shtëpie.
Një prej nxënëseve përfundoi me fraktura në spital pas dhunës së mësuesit i cili e kreu këtë veprim në gjendje të dehur, por megjithatë Gjykata ka dhënë një vendim që me siguri do të ngjallë revoltën e familjarëve të fëmijëve.
(Boldnews)
