Bizneset dhe individët morën rreth 17 miliardë lekë kredi të re në muajin prill, me një rritje prej 52% në krahasim me muajin mars, kur u shënua dhe niveli më i ulët në vite i huamarrjes, për shkak të krizës ekonomike që nisi në mes të marsit pas kufizimit të aktiviteteve me qëllim parandalimin e përhapjes së Covid-19.
Por, të dhënat e detajuara tregojnë se rritja e huasë në prill ka ardhur vetëm nga kredia për kapital qarkullues, që përdoret nga kompanitë për nevoja likuiditeti. 65% e kredisë së re në prill është marrë për likuiditet ose kapital qarkullues, nga rreth 40% që ishte kjo peshë në dhjetor.
Pozitivisht ka ndikuar dhe fondi i garancisë për pagat prej 11 miliardë lekësh, që u miratua nga qeveria për bizneset që kishin problem me pagesat e punonjësve, megjithëse Banka e Shqipërisë bëri të ditur se deri në fillim të majit ishte përdorur 10% e këtij fondi.
Ndryshe nga bizneset, individët kanë qëndruar në pritje. Huaja e re për individët ishte 3.4 miliardë lekë në prill, e pandryshuar me një muaj më parë dhe e përgjysmuar në raport me mesataren mujore të 2019-s. Individët kanë përdorur kryesisht overdraftin dhe kanë marrë hua për blerje pajisjesh, ndërsa ka rënë në minimum huaja për blerje të pasurive të paluajtshme, ndryshe nga viti 2019, kur kredia për shtëpi njohu zgjerim.
Sipas të dhënave të Bankës së Shqipërisë, në krahasim me mesataren mujore të 2019-s, kredia e re në total në prill është 15% më e ulët.
Rreth 70% e kredisë së re të dhënë në prill ishte në lekë.
Së fundmi, Banka e Shqipërisë miratoi disa ndryshime që mundësojnë një shtyrje të dytë të kësteve të pagesave të kredive të bankave edhe për tre muaj të tjerë (qershor-gusht). https://www.monitor.al/bsh-miraton-masat-qe-mundesojne-shtyrjen-e-kesteve-te-kredise-edhe-per-3-muaj/
Nga shtyrja e parë u ristrukturuan rreth 2 miliardë euro kredi, ose rreth 42% e stokut total të huasë, ku pjesa më e madhe (85%) ishte ristrukturim nga bizneset, sipas të dhënave nga Banka e Shqipërisë.
Në fund të muajit prill stoku i kredisë në vend ishte 578 miliardë lekë, ose 4.7 miliardë euro. Në raport me marsin, stoku i kredisë shënoi rënie me 3.2%, por që erdhi kryesisht për shkak të zhvlerësimit të euros, çka uli dhe stokun e huasë në euro, e cila raportohet në monedhën vendase. Rënia shënoi dhe stoku i huasë për korporatat jo financiare publike. /Monitor/
