Moisi Habilaj ka lënë qelitë e burgut, pas vendimit të Gjykatës së Apelit në Catania, por do të vijojë të qëndrojë në arrest shtëpie.
Mediat italiane njoftojnë se Habilaj do të qëndrojë në San Michele di Ganzaria, në një banesë me masë sigurie “arrest shtëpie”.
Gjykata pranoi kërkesën për modifikimin e masës së paraburgimit të paraqitur nga avokatët Maria Caltabiano dhe Francesco Strano Tagliareni.
Habilaj u dënua në shkallën e parë të Gjykimit me 15 vjet e 5 muaj burg.
Ky vendim mbylli kapitullin e parë gjyqësor që rezultoi nga hetimi ‘Rosa dei Venti’, ku ai ishte akuzuar së bashku me vëllain e tij Florian Habilaj, si kreu i një grupi trafikantësh që kishin trafikuar nga Shqipëria në Sicili, drogë me vlerë 20 milionë euro.
Habilajt bënë bujë në arenën politike shqiptare në tetor 2017, pasi policia italiane mbylli një operacion katërvjeccar përgjimi me arrestimin e një dyzine personash të dyshuar, shqiptarë dhe italianë dhe i akuzoi ata për trafikimin e tonelatave marijuanë nga Shqipëria për në Itali.
Dokumentet gjyqësore italiane, të cilat u publikuan fillimisht nga Partia Demokratike në opozitë në Shqipëri, shkaktuan tronditje të madhe politike për shkak të diskutimeve të trafikantëve mbi jetën politike në Shqipëri, përfshirë lidhjet që kishin me ish-Ministrin e Brendshëm Saimir Tahiri. Ky i fundit u përball me gjykimin në shkallën e parë për Krimet e Rënda, ndërsa u dënua për shpërdorim detyre me 3.4 vjet shërbim prove.
Rasti i Habilajve rëndoi mbi qeverinë shqiptare, e cila është akuzuar në mënyrë të përsëritur se ka lejuar dhe ndihmuar kultivimin e kanabisit në vitet 2015 e më pas duke e kthyer Shqipërinë në një narkoshtet.
