Përhapja e koronavirusit të ri është përshpejtuar në Brazil, Peru dhe në Kili, theksoi sot agjencia rajonale e Organizatës Botërore të Shëndetësisë duke iu kërkuar këtyre vendeve të mos lehtësojnë masat e destinuara për të ngadalësuar kontaminimet.
“Në Amerikën e Jugut, ne jemi shumë të shqetësuar pasi numri i rasteve të reja të regjistruara javën e kaluar në Brazil është më i larti në një periudhë shtatëditore nga fillimi i pandemisë”, theksoi, Carissa Etienne, drejtoreshë e Organizatës panamerikane të Shëndetësisë (OPS), me seli në Uashington.
“Peruja dhe Kili kanë regjistruar gjithashtu nivele të larta, shenjë se përhapja e virusit po përshpejtohet në këto vende”, shtoi ajo.
“Amerika Latine dhe Karaibet tani kanë 774 767 raste zyrtare të kontaminimit me koronavirusin e ri dhe më shumë se 41 600 të vdekur”, sipas të dhënave zyrtare.
“Numri i përditshëm i infeksioneve të reja ka tejkaluar atë të Evropës dhe SHBA-së duke e bërë kontinentin e Amerikës Latine “pa dyshim” epiqendrën e re të pandemisë”, sipas OPS.
