Një 25 vjeçar është ekzekutuar në Vlorë.
Ai është gjetur në zonën e Ujit të Ftohtë, ndërsa policia ka mundur të gjejë një automjet të djegur dhe brenda tij një armë automatike, me të cilën dyshohet se është kryer krimi.
Sipas të dhënave të para, mësohet se krimi ka ndodhur rreth orës 04:00 të mëngjesit.
I riu Kristian Breshanaj ka marrë 5 plumba në trup. Ai mësohet se kishte 3 muaj që ishte kthyer nga Belgjika.
Mësohet se 25 vjeçari është djali shefit të reanimacionit në spitalin e Vlorës. Policia ka nisur hetimet, ndërsa ka shoqëruar disa persona.
Njoftimi i policisë
Në lagjen “Uji i Ftohtë”, pranë zonës së quajtur “7 pallatet”, në rrethana ende të paqarta është vrarë në rrugë dyshohet me armë zjarri shtetasi K. B., 25 vjeç.
Forca të shumta të policisë kanë shkuar menjëherë në vendngjarje, janë ngritën pika kontrolli dhe vijon krehja e zonës për kapjen e autorit/ëve.
Gjatë krehjes së zonës, në një nga rrugicat e lagjes “10 Korriku” Vlorë, shërbimet e Policisë kanë konstatuar në flakë një automjet, brenda të cilit është gjetur një armë zjarri automatik kallashnikov, e cila dyshohet të jetë arma e krimit. Policia e Vlorës ka nisur të shoqërojë persona që mund të kenë dijeni për rrethanat e krimit.
