N’Golo Kante është i përgatitur të bojkotojë pjesën tjetër të sezonit nëse Premier League rikthehet të luajë ndeshjet e mbetura. Shkak për këtë vendim është se mesfushori francez nuk ndihet rehat dhe është i frikësuar nga një infektim i mundshëm me Covid-19.
SkySport raporton se për këtë vendim, mesfushori i talentuar ka mbështetjen e plotë të trajnerit Frank Lampard dhe bordit të klubit të Chelseat. Kante ishte të martën në bazën e stërvitjes në Cobham por nuk është trajnuar pasi ka shprehur këto shqetësime.
Kante ka humbur vëllanë e tij si pasojë e një infarkti dhe trajneri Lampard është shprehur tolerant dhe mbështetës për këtë situatë. Në fakt, të gjitha klubet e Premier Ligës kanë thënë se kush është nervoz, nuk do të detyrohet të luajë.
