Presidenti Bujar Nishani, në fjalën e mbajtur në Organizatën e Kombeve të Bashkuar deklaroi se Shqipëria është besnike ndaj parimeve të OKB-së, duke mbështetur të gjitha aksionet për paqen.
“Dëshiroj të nënvizoj se vendin im mbetet besnik ndaj OKB-së. Dua të përfitoj dhe tu siguroj se vendi im ka ndjeshmërinë e duhur ndaj sfidave dhe mbështet të gjitha përpjekjet për ndalimin e konflikteve dhe për të siguruar paqe dhe siguri.
Zbatimi i angazhimeve në fushën e sigurisë janë vlerësuar në rajon dhe nga ndërkombëtarët. Shqipëria është e angazhuar për të ndaluar krizat.
Sulmet terroriste në vitet e fundit Janë intensifikuar, duke goditur vende të mëdha të botës, me qëllim gjunjëzimin e tyre. Shqipëria vlerëson rolin e OKB-së në parandalimin e ekstremizmit të dhunshëm”, tha Nishani.
Duke folur për procesin e integrimit, Nishani theksoi se Bashkimi Evropian po kalon sfida të forta pas Brexit, duke nënvizuar se Shqipëria është e vendosur për të vijuar rrugën e reformave.
“Marrja e statusit të vendit kandidat dhe pritshmëria për hapjen së shpejti të negociatave të aderimit në Union, janë njohje të arritjeve të Shqipërisë në realizimin e reformave të nevojshme dhe arritjen e standardeve të kërkuara.
Bashkimi Evropian po kalon sfida të forta, veçanërisht pas BREXIT, por Shqipëria është e vendosur për të vijuar me rrugën e reformave, duke e konsideruar integrimin evropian si objektivin më madhor të saj dhe alternativën e vetme e më të mirën”, u shpreh gjatë fjalës së tij Nishani.
