Një autobus i një agjencie turistike ka dalë nga rruga dhe ka përfunduar në një kanal anësor në zonën e Ishull-Shëngjinit, mesditën e kësaj të shtune. Fatmirësisht, nga ngjarja nuk ka persona të lënduar.
Sipas informacioneve paraprake, autobusi po kthehej nga Shëngjini dhe drejtuesi i tij kishte zgjedhur një rrugë dytësore për të shmangur trafikun e rënduar në dalje të zonës turistike. Gjatë lëvizjes në një segment të ngushtë rrugor, përballë mjetit ka ardhur një automjet tjetër.
Për të shmangur përplasjen, shoferi ka devijuar drejt skajit të rrugës, por si pasojë autobusi ka rrëshqitur dhe ka përfunduar në një kanal.
Në autobus nuk kishte turistë, por vetëm anëtarë të stafit të agjencisë, të cilët kanë dalë menjëherë jashtë mjetit pa pësuar lëndime.
Nga aksidenti janë regjistruar vetëm dëme materiale, ndërsa policia rrugore ka nisur hetimet për të sqaruar rrethanat e plota të ngjarjes.
