Në protestën qytetare kundër qeverisë, një banor i zonës së Kakomesë ngriti sërish shqetësimin për atë që e cilësoi si bllokimin e plazhit të Kakomesë prej më shumë se dy dekadash.
Qytetari ka akuzuar biznesmenin Luan Leka dhe interesat oligarkike për bllokimin e aksesit në plazh prej më shumë se dy dekadash.
“Rama, jep dorëheqjen! Të dashur miqtë e mi, unë nuk do ta zgjas shumë. Të njëjtin problem që kanë pasur banorët e Zvërnecit, ne e kemi prej 20 vitesh në Kakome, ku oligarkët na kanë vendosur një portë në plazhin tonë.
Poshtë oligarkët! Rama burg, Berisha burg!
Edhe te ne janë oligarkët, Luan Lekaj i sallamit, ai tjetri, Dritani. Ç’punë kanë ata që na kanë vendosur një portë? Po kush do ta shembë atë portë atje?
Në fshatin tonë kanë mbetur 20 plaka dhe 10 pleq, sepse Edi Rama ua ka detyruar të gjithëve rrugën e kurbetit. E ka shpopulluar Shqipërinë.“, ka thënë protestuesi.
Çfarë ka deklaruar Luan Leka për Kakomenë?
Debati për Kakomenë nuk është i ri. Në vitin 2021, biznesmeni Luan Leka reagoi publikisht ndaj kritikave dhe kundërshtimeve për projektin e resortit turistik në Gjirin e Kakomesë, raporton Boldnews.
Përmes përfaqësuesve të tij ligjorë, Leka deklaroi se pronësia dhe lejet për projektin janë në përputhje të plotë me ligjin, duke i cilësuar si shpifje akuzat e ngritura kundër kompanisë “Riviera Kakome”.
Ai bëri të ditur se projekti parashikonte ndërtimin e një resorti turistik me 5 yje dhe 375 dhoma, ndërsa sipas tij operatorë ndërkombëtarë si Hilton, Accor, Barcelo dhe Radisson kishin shfaqur interes për menaxhimin e kompleksit.
Çfarë thotë gazetari Gjergj Erebara?
Së fundmi, çështja është rikthyer në vëmendje edhe nga gazetari Gjergj Erebara.
Në një reagim publik, Erebara kujtoi se rreth 22 vite më parë gjiri i Kakomesë u rrethua për ndërtimin e një resorti luksoz, ndërsa banorët e Nivicës kundërshtuan projektin duke pretenduar se toka u përkiste familjeve të tyre prej brezash.
Sipas tij, edhe pse kanë kaluar më shumë se dy dekada, resorti nuk është ndërtuar ende, ndërsa zona vijon të mbetet e rrethuar dhe aksesi në plazh i kufizuar.
“Sot duhet të protestojmë edhe për Kakomenë”, shkroi Erebara, duke e cilësuar rastin si simbol të konflikteve të pazgjidhura të pronësisë dhe lidhjeve mes pushtetit politik dhe interesave ekonomike, percjell Boldnews.
Si qëndron çështja e Kakomesë?
Konflikti për tokat në Kakome vijon prej vitit 2004. Qeveria shqiptare vendosi të lëshojë me koncesion hapësirën prej 70 hektarësh në gjirin e Kakome.
Koncesioni u dha në bazë të një ligji të vitit 1993, i cili nuk njeh pronësinë private në tokat pranë bregut të detit. Banorët e Nivicës pohojnë se janë të vendosur të mos lejojnë ndërtimin e një fshati turistik në tokat e tyre dhe kërkojnë njohjen dhe kthimin e të gjithë pronave.
Sipas dokumenteve të paraqitura prej tyre, 126 familje të fshatit janë pronarë të 4300 hektarëve kullota. Por pjesa më e madhe e kullotave janë toka pa vlerë të konsiderueshme financiare ndërsa gjiri i Kakomesë është pjesa më e rëndësishme e kësaj prone.
Kakomeja konsiderohet një nga konfliktet më të gjata dhe më të debatueshme të pronësisë në jug të Shqipërisë.
Nga ana tjetër, investitorët kanë mbrojtur vazhdimisht ligjshmërinë e projektit dhe dokumentacionit të tyre, duke argumentuar se zhvillimi turistik do të sillte investime dhe punësim në zonë.
Protestat që nuk janë ndalur
Kundërshtimet për Kakomenë janë shoqëruar ndër vite me protesta, përplasje dhe akuza të vazhdueshme mes banorëve, investitorëve dhe institucioneve shtetërore.
Edhe në protestat e fundit kundër qeverisë, Kakomeja u rikthye si një nga simbolet e pakënaqësisë qytetare ndaj mënyrës se si janë menaxhuar pronat publike dhe pasuritë natyrore në vend.
Për shumë protestues, porta që vazhdon të kufizojë hyrjen në gjirin e Kakomesë mbetet simbol i një konflikti që prej më shumë se 20 vitesh nuk ka gjetur ende zgjidhje./Boldnews
