Lëvizja VETËVENDOSJES në Tiranë ka reaguar pas protestës së sotme një ditë pas shembjes së Teatrit Kombëtar. Në një mesazh, VETËVENDOSJA thotë se një popull nuk i nënshtrohet një njeriu.
“Qytetarë, artistë dhe aktivistë të shoqërisë civile dolën sot në protestë kundër aktit barbar e kriminal të klikës në pushtet që shkatërroi më 17 maj, një ditë më parë, Teatrin Kombëtar. Aktivistët e Lëvizjes VETËVENDOSJE! në Shqipëri iu bashkuan protestuesve me qëllimin për të ndalur tjetërsimin e mëtejshëm të pronës publike të Teatrit. Ata kërkuan publikisht rindërtimin e kësaj pasurie të trashëgimisë kulturore kombëtare, sipas projektit origjinal arkitekturor dhe me kushte të brendshme moderne”, thuhet në një njoftim.
“Protestuesit kërkuan lirimin e menjëhershëm të qytetarëve që mbahen padrejtësisht të burgosur. Ndaj një pjese prej tyre janë ngritur akuza të montuara politikisht. Midis tyre është edhe drejtori ekzekutiv i Lëvizjes VETËVENDOSJE! në Shqipëri, Boiken Abazi. Drejtësia duhet të hetojë dhe gjykojë dhunuesit e qytetarëve ditën për diell, shkatërruesit e pasurive kombëtare natën si dhe ata që dhanë urdhër për ndërhyrje me forca të armatosura në goditjen e ndërtesës bashkë me njerëz brenda”, vijon më tej.
“Shteti nuk është as i kryeministrit dhe as i kryetarit të Bashkisë, por i qytetarëve. Kur përmes akteve të dhunshme arbitrare, shteti bie në dorë të oligarkëve shpërdorues dhe autokratëve, lind nevoja e ç’kapjes së tij përmes aksionit popullor. Ata që sot rezistojnë, nesër fitojnë”, mbyllet njoftimi.
