Bundesliga gjermane është bërë liga e parë kryesore e futbollit europian që kthehet në fushë, pasi pezulloi sezonin e saj për shkak të pandemisë së coronavirusit në fillim të marsit.
Liga rifilloi sezonin e saj 2019-2020 ditën e shtunë ku u luajtën gjashtë ndeshje, duke përfshirë derbin e shumë pritur midis Borussia Dortmund dhe FC Schalke.
Ditën e djeshme u luajtën edhe dy ndeshje të tjera ato mes Koln-it dhe Mainz-it dhe Union Berlin kundër Bayern Munich. Kjo fundjavë tërhoqi më shumë se gjashtë milionë shikues të televizionit në Gjermani. Sipas portalit Seebiz, falë kësaj, kompania televizive Sky, e cila transmeton ndeshjet, theu rekordin e vet të shikimit të kampionatit gjerman.
Ditën e shtunë në orën 15:30, kur filluan ndeshjet e para të raundit të 26-të, Sky u shikua nga 3.68 milionë shikues në kanalet e paguara, që është dy herë më shumë se shifra e zakonshme për të shtunën në futboll.
Kësaj i duhet shtuar 2,45 milionë shikues që i shikuan ndeshjet në kanalin televiziv falas Sport News, i cili është i disponueshëm për të gjithë.
