Ish-drejtori i Policisë së Vlorës, Jaled Çela, është dorëzuar sot në Drejtorinë e Policisë së Tiranës i shoqëruar nga avokati i tij.
Çela është dënuar nga Gjykata e Krimeve të Rënda me akuzën e “shpërdorimit të detyrës” fillimisht me 5 vite burg, e cila u konvertua në 3.4 vite për shkak të gjykimit të shkurtuar.
Trupi gjykues hodhi poshtë akuzën për “grup të strukturuar kriminal” siç ishte pretenca e prokurorisë duke e dënuar Çelën për një akuzë të lehtë.
Abcnews ka trametuar pamjet kur Çela dorëzohet në drejtorinë e Policisë së Shtetit.
I veshur sportiv dhe me kapele në kokë, Çela afrohet pranë godinës, pasi më parë ka zbritur nga një automjet. Ai flet në telefon dhe më pas vendos të futet në polici duke kontaktuar fillimisht me oficerin e rojes.
Më pas ai e shoqëron në pjesën tjetër të godinës për vijimin e procedurave.
Çela u akuzua se ndihmoi grupin e Habilajve për trafikimin e lëndëve narkotike në Itali. Në këtë dosje është edhe ish-shefi i drejtorisë kundër narkotikëve Gjergji Kohilla, Sokol Bode si edhe ish-minitri i Brendshëm, Saimir Tahiri. /abcnews.al
