Një bar në Gjermani ka ”festuar” rihapjen pas karantinës, duke i dhënë klientëve komardare pishinash, si në foto. Për të ruajtur distancimin social, sigurisht.
Të shtunën e kaluar kafet në landin e Meckelenburg, u lejuan të rihapen pasi u lehtësuan masat për koronavirusin. Në vend që të përdornin shenjat në tokë apo ndarëset prej peçikllazi, për të detyruar njerëzit të qëndrojnë larg, pronaret e barit “Cafe Rothe” i shpërndanë njerëzve kapele, me dy komardare me ngjyra të lidhura në to.
Qytetarët gjermanë duket se shijuan daljen, motin e mirë dhe metodën origjinale të mbajtjess së distancës. Kështu të paktën thotë pronarja e lokalit për CNN. Sipas saj, njerëz të shumtë erdhën dhe u ulën në bar, pasi panë foton që ajo postoi në rrjetet sociale, me njerëzit që mbanin komardaret në kokë.
“Ishte metoda perfekte për njerëzit, pasi ishte edhe zbavitëse. Megjithatë na tregoi se sa e vështirë është që njerëzit të mbajnë 1 metër e gjysëm distancë nga njëri-tjetri.”- tha 52-vjeçarja.
Ajo po ashtu tregon se biznesi i saj ka zakonisht 36 tavolina brenda dhe 20 jashtë, kur është koha e mirë. Por tani, për shkak të masave të reja të higjenës, ka vetëm 12 brenda dhe 8 jashtë.
Tani që kancelarja Merkel deklaroi se Gjermania e ka kaluar fazën 1 të pandemisë dhe do të ketë lehtësimë të tjera, deri në hapjen graduale, pronarët e bizneseve presin të fillojnë udhëtimet dhe të hapen kufijtë. Për ta, puna me turistët është kryesorja.
