Prokuroria e Krimeve të Rënda në nëntor të 2017 urdhëroi arrestimin e tre drejtuesve të lartë të Policisë së Shtetit: Jaerd Çelës, ish-drejtori i policisë së Vlorës; Gjergji Kohilës, shefi i sektorit të luftës kundër krimit të organizuar në drejtorinë e Qarkut Vlorë; dhe Sokol Bodes ish-kreu i policisë kufitare të Dhërmiut.
Operacioni u dekonspirua, ndërsa 3 drejtuesit e policisë arritën të shpëtonin.
Prej këtij momenti ata u shpallënn në kërkim dhe hera herës organizoheshin operacione për kapjen e tyre, por pa rezultat.
Sot, pasditen e së shtunës, Jaeld Çela, i shoqëruar nga avookati i tij, u shfaq në Drejtorinë e Policisë së Tiranës, ku u vetëdorëzua.
Nuk dihet se ku ka qëndruar për rreth 3 vjet ish-kreu i policisë së Vlorës, i cili u gjykua në shkallën e parë të Krimeve të Rënda bashkë me ish-ministrin Saimir Tahiri. Të dy u dënuan për shpërdorim detyre, me nga 3.4 vite burg secili, por në rastin e Tahirit dënimi iu konvertua në shërbim prove.
Si prokuroria, ashtu edhe Tahiri dhe Çela kanë apeluar vendimin në Gjykatën e Apelit, ku pritet të gjykohen, pasi seanca e parashikuar më 13 maj u shty për shkak të masave anti-Covid.
Nga hetimet ka rezultuar se ish-drejtori i Policisë ka mbajtur në përdorim 3 numra telefoni, në të cilat rezulton se ka komunikuar me Florian Habilajn dhe Gentian Cekën, shoferin e ish-ministrit të Brendshëm Saimir Tahiri.
Ashtu si ish-ministri Tahiri, edhe Çela u akuza për veprat penale “trafikim i narkotikëve në bashkëpunim në formën e grupit të strukturuar kriminal”, “kryerja e veprave penale nga organizata kriminale”, “grup i strukturuar kriminal”.
Asnjë nga këto akuza të Prokurorisë nuk u pranua nga Gjykata, e cila e shpalli fajtor vetëm për “shpërdorim detyre”.
Para se prokuroria të kërkonte arrestimin e tij, opozita kishte denoncuar jo pak herë përfshirjen e tij në trafiqe të lëndëve narkotike.
Në dhjetor të 2016, ish-kryeministri Sali Berisha publikoi një foto ku shfaqej Sokol Bode, në atë kohë shef i policisë kufitare të Dhërmiut, në shoqërinë e Moisi Habilaj, i arrestuar në Itali.
Në mars 2017, Sokol Bode u transferua në policinë e Shkodrës. Aktualisht ai po hetohet nga Shërbimi i Kontrollit të Brendshëm për shkelje të disiplinës gjatë kapjes së një grupi kriminal që trafikonte drogë drejt Malit të Zi.
Në prill të 2017, opozita denoncoi se një ngarkesë droge prej 72 pako kanabis e sekuestruar në Zvërnec të Vlorës ishte e porositur nga Jaerd Çela dhe Gjergji Kohila.
Gjithsesi në përfundim të gjykimit në shkallën e parë të Krimeve të Rënda, Çela u dënua për shpërdorim detyre.
