Fernando Alonso u tërhoq nga bota e Formula 1 në vitin 2018 por duket se pilotit spanjoll i është paraqitur mundësia e rikthimit.
Ditët e fundit ka pasur disa lëvizje në skuderitë e Formula 1, me Ferrarin që do të zëvendësojë Sebastian Vettel me Carlos Sainz. McLaren në krahun tjetër i ka marrë Renault australianin Daniel Ricciardo.
“Marca” raporton se Renault po tenton të kthejë kampionin e botës, aty ku shpërtheu, duke u shpallur kampion bote dy herë, në vitet 2005, 2006. Skuderia franceze kërkon një pilot me eksperiencë dhe Alonso është një emër i madh dhe i lidhur me këtë skuderi. Spanjolli nuk është opsioni i vetëm në fakt, pasi po mendojnë edhe për Sebastian Vettel.
Gjithsesi “fiksimi” më i madh është Alonso dhe Renault ka gjetur zgjidhjen edhe për çështjen e pagës, që shikohet si një problem. Liberty Media është gati të paguajë një pjesë të pagës së spanjollit dhe po tentohet që bisedimet të mbyllen sa më shpejt.
