Gjykata e Kavajës vendosi masën e sigurimit personal “arrest me burg” për shtetasin Isa Sula, 76 vjeç i cili pak ditë më parë plagosi me thikë shokun.
Isa Sula banues në Lushnje, u arrestua në flagrancë dhe do të përballet me akuzën “Vrasje me dashje e mbetur në tentativë” dhe “Mbajtje pa leje e armëve të ftohta,” pasi për motive të dobëta qëlloi disa herë me thikë dhe plagosi shokun e tij N.C. me të cilin 1 ditë më parë kishin pirë raki për më shumë se dy orë.
Në momentin e arrestimit në cilësinë e provës materiale u sekuestrua edhe “arma” e krimit, mjeti prerës e llojit thikë.
Në Gjykatë pala mbrojtëse e të arrestuarit I.S. ka shfaqur pretendimin se nuk kemi të bëjmë me veprën penale “vrasje me dashje e mbetur në tentativë’ por ‘plagosje’ pasi Isai nuk ka pasur qëllim ta vrasë shokun e tij prej 40 (dyzet) vitesh por ai kishte shkuar atje për t’u sqaruar për ato që kishin biseduar 1 ditë më parë kur ishin duke pirë raki.
Aktualisht i plagosuri N.C. ndodhet jashtë rrezikut për jetën ndërsa pala mbrojtëse ka 10 ditë kohë për të apeluar vendimin.
