Mjeku Tritan Kalo tha mbrëmjen e sotme në emisionin Open se numri i rasteve 4 që janë identifikuar sot është i njëjtë me numrin e rasteve të zbuluara në fillimin e epidemisë së Covid-19.
Kalo ka ripërsëritur këshillat që duhet të respektojnë qytetarët në mënyrë që mos kemi rikthime të rasteve dhe vera të kalojë e qetë.
“Mund të ketë një rikthim të Covid-19 në vjeshtë, por e rëndësishme është që të ketë një imunizim të popullatës që mos të ketë një transmetim të virusit të ri nga njeriu te njeriu. Gjithsesi shpresojmë të kemi një ilaç specifik lidhur me virusin e ri, ose të shpresojmë lidhur me vaksinën, pasi janë mbi 108 të tilla që po testohen”, tha Kalo.
Lidhur me rastet e para të shfaqjes së Covid-19 në Shqipëri, Kalo tha se në janar apo shkurt, janë vënë re viruse të virulencës A, nuk ka pasur një shtim të rasteve në krahasim me vitin e kaluar të personave të prekur, apo të mortaliteteve.
“Kjo më bën të orientohem drejt asaj që virusi nuk ka qenë prezent muaj më parë, gjithsesi mendoj se ky është një debat që po bëhet në çdo vend të Botës”, tha Kalo.
I pyetur lidhur me mllefin ndaj politikës, Kalo tha se këtë e ka pasur që nga marsi i vitit 1992.
“Kishim 4 figurat kryesore të vendit mjekë. Presidenti, ministri i Jashtëm, ai i shëndetësisë dhe kreu i Grupit Parlamentar të PD, ishin të gjithë mjek, dhe mos harrojmë se ky ishte një shans i artë për të bërë shëndetësinë. U gabua, u politizua”, tha Kalo.
