Mjekë imazheristë kanë publikuar të tjera imazhe pulmonare, madje edhe video, që forocojnë edhe më tej faktet se koronavirusi në Shqipëri qarkullon prej muajsh.
Imazhet e publikuara janë realizuar nga imazheristët e spitalit “Shefqet Ndroqi” dhe ato nisin prej 17 janarit. Janë një seri imazhesh që minimalisht duhet të analizohen nga ISHP dhe të krahasohen me imazhet pulmonare të pacientëve aktualë me koronavirus.
Nëse përmes këtyre imazheve provohet prania e koronavisurit te pacientët e shtruar apo kontrolluar në spitalet shqiptare, atëherë prania e Covid-19 në Shqipëri nuk përkon më me atë që konsiderohet rasti zero, pra me datën 8 mars, por me shumë muaj më parë.
Madje këto imazhe rrëzojnë edhe deklarimet e Kryeministrit Edi Rama, sipas të cilit prania e koronavirusit në Shqipëri, është në muajin mars. Por jo vetëm kaq, këto fakte dhe prova rrëzojnë edhe deklarimet dhe konkluzionet e dhëna sot nga grupi ekspertëve që bëjnë pjesë në Komitetin Teknik të ngritur nga Qeveria. Sot anëtarë të këtij komiteti deklaruan se në janar dhe shkurt nuk ka pasur raste me Covid-19, ndërsa Rama ironizoi se sipas disa pretendimeve armiku i padukshëm i paska goditur më shpejt shqiptarët.
Siç duket Rama nuk ka lexuar as konkluzionet e shkencëtarëve të njohur europiane, apo OBSH, që kërkon hetimin e rasteve të hershme, pas botimit të studimeve që tregojnë se Covid-19 është shpërndarë shumë muaj më parë se të jepej alarmi për virusin e ri.
