Mjeku infeksionist Pëllumb Pipero tha mbrëmjen e sotme në emisionin “Open” se qytetarët duhet të ruajnë distancimin fizik, sikundër të mbajnë maskat dhe dorezat për mbrojtjen e duarve.
Pipero tha se rritja e rasteve gjatë ditës së sotme është një sinjal që virusi qarkullon midis nesh, por shtoi se këtu s´ka asgjë shqetësuese nëse respektohen masat.
Lidhur me situatën e pacientëve në spitale, Pipero tha se edhe ata që janë në terapi intensive ndodhen në gjendje të stabilizuar, ka një kujdes maksimal dhe uroj që gjendja e tyre të shkojë drejt përmirësimit.
“Covid-19 është në progression rënës dhe te ne është nën kontroll, ndoshta më mirë se në vendet e tjera të rajonit”, tha Pipero.
Lidhur me kohën se kur është përhapur koronavirusi në Shqipëri, Pipero tha se është një diskutim që duhet të bëhet mes ekspertëve në fund të kësaj epidemie.
“Nuk jam specialist imazherist, as epidemiolog, por i qëndroj analizës sime, bazuar në indikatorë epidemiologjikë dhe klinikë, është se virusi ka filluar të qarkullojë në vendin tonë në fund të muajit shkurt, ose në dy javët e fundit të këtij muaji”, tha Pipero.
