Deputeti Lefter Maliqi u shpreh sot se masat e ndërmarra nga Qeveria janë ekstreme, ndërsa populli u fut nën panik dhe terror nga Kryeministri që qëndronte në bunkerin e tij në Surrel.
Maliqi tha se është fat i keq i shqiptarëve që drejtohet nga një njeri që nuk ka lidhje me Partinë Socialiste, por me një “Rilindje” të korruptuar.
“E vërteta është se shqiptarët i besuan timonit dhe tepsisë së Ramës, pavarësisht se sikundër e kemi parë edhe nga BILD, se Kryeministri, Kreu i Komisionit të Ligjeve, deputetë dhe ministra, u angazhuan në manipulimin e zgjedhjeve me bandat kriminale.
Rama i ka kapur të gjitha institucionet, në Parlament kanë mbetur 5-6 deputetë të opozitës së re që votojnë kundër, jemi pa Gjykata, pa Gjykatë Kushtetuese, pa kryetar bashkish dhe këshillash bashkiake, që janë monopartiakë, kemi terror, panik, varfëri”, tha Maliqi. Sipas tij, një diktaturë nuk ka asgjë më shumë se kjo që ka bërë Edi Rama, i cili ia ka kaluar edhe Enver Hoxhës.
Deputeti tha se nga muaji qershor duhet të nisin protestat e pandalshme deri në shpërndarjen e këtij Parlamenti.
“Kam besim se protestat do të nisin, kam besim edhe te Presidenti i Republikës, që në 2 mars zhvilloi një protest madhështore. Ky është një Kryeministër qesharak, që del dhe puth moshën e vjetër. Edhe paketat që ka hartuar gjoja në ndihmë të qytetarëve janë një shoë dhe asgjë më shumë”, tha Maliqi.
Sipas tij, beu i Surrelit në këtë situatë vetëm përhap panik, terror me arkivole dhe është mbyllur në bunker, ndërsa Presidentin e shikojmë aktiv.
“Edhe me rolin e ish-liderit Berisha, me angazhimin e Presidentit dhe të opozitës, populli do të ngrihet dhe do e rrëzojë këtë sistem, që nuk i shërben interesave të vendit”, tha Maliqi.
