Ekspertë të aviacionit, sipas një raporti të përgatitur për prokurorinë kanë hedhur dyshime se avioni është ngarkuar dhe në momentin që ka tentuar të ngrihet, ka pësuar defekt, për shkak të peshës së madhe.
Në vendin e ngjarjes, prokurorët gjeten prova se ishte ndezuar zjarr. Sipas tyre piloti mund të jetë orientuar nga zjarri sinjalizues për të bërë uljen. Dyshohet se në të vërtetë piloti italian u nis natën nga Italia dhe në të zbardhur ka zbritur në pistën e improvizuar. Aty është ngarkuar me kanabis dhe ka tentuar të ngrihet, por ka pësuar defekt në rrotën e parë. Në vendin e ngjarjes janë gjetur disa vida të liruara të pjesës së jashtme të trupit të avionit, i cili është anuar në krah. Ekspertët thonë se për shkak të mbipeshës dhe erës kundër avionit, mjeti nuk ka mundur të ngrihet dhe është anuar, sepse çantat nuk ishin fiksuar si duhet brenda në bord.
Nga ana tjetër prokuroria për Krime të Rënda ende nuk e ka firmosur marrëveshjen e bashkëpunimit me pilotin italian Guido Andrea Guidi, pasi dyshohet se ai gënjen. 69 vjeçari ka dhënë versione të ndryshme të ngjarjes, në dy rastet kur është marrë në pyetje. Guido Andrea Guidi pretendon se nuk është pritur në pistë nga asnjë person dhe nuk ka ngarkuar kanabis në avion.
Hetuesit dyshojnë se personet e tjerë që prisnin avionin, janë larguar me mjete lundruese nga deti. Prokuroria i kërkoi kapitenerisë së Durrësit të dhëna për identifikimin e mundshëm të ndonjë mjeti lundrues në orën e para të mëngjesit të së enjtes. Por veç kësaj, prokurorët kanë kërkuar nga kompanitë e telefonisë lëvizëse, ti vënë në dispozicion në bazë të qelizave, të gjithë lëvizjet e numrave të telefonit në zonën ku ka ndodhur ulja e avionit Piper/Abcnews
