Policia greke ka arrestuar një shqiptar, ndërkohë që ka shpallur në kërkim bashkëpunëtorin e tij, që akuzohen për vjedhjen e pajisjeve në laboratorët dhe zyrat e profesorëve të Universitetit Teknik të Athinës dhe Universitetit Kombëtar Kapodistrian.
Pajisjet e vjedhura vlerësohen në shumën e 200 mijë eurove.
Shqiptari i arrestuar, i moshës 37 vjeç, u kap në periferinë e Zografou, ndërsa bashkëpunëtori i tij 28-vjeçar është ende i lirë.
Mediat greke raportojnë se në periudhën shkurt-prill, shqiptarët kanë vjedhur pajisjet në mbi 25 zyra profesorësh dhe 20 laboratorë në të dy universitetet.
Shqiptarët pasi kryenin vjedhjet, vijonin të jetonin në një nga dhomat e një konvikti të vjetër, ku edhe kishin fshehur shumë nga pajisjet e vjedhura.
Sipas informacioneve, të dy shqiptarët ishin përfshirë në rrëmbimin e një studenti 16-vjeçar nga zona e Kaisariani rreth dy vjet më parë kur e futën në bagazhin e makinës që drejtonte, e çuan në shtëpinë e tij, rrahën babanë e të riut, grabitën dhe u larguan.
Arrestimi i shqiptarit dhe identifikimi i bashkëpunëtorit të tij u kryen si pjesë e një hetimi nga Drejtoria e Sigurisë së Atikës për raste të vjedhjeve në dy universitetet nga fundi i shkurtit deri në mes të prillit 2020.
37-vjeçari u gjet në zonën e Zografou duke hipur në një makinë, me targa dukshëm të rreme.
Policisë i është dashur të përdorë armët për ndalimin e shqiptarit, pasi ai tentoi të largohej me automjetin e tij, duke rrzikuar jetën e efektivëve, raportojnë mediat.
