Nënkryetari i LSI-së, Petrit Vasili, ka ironizuar Kryeministrin Edi Rama, lidhur me masat kufizuese, duke e cilësuar inkuzitor të lirive dhe shkencës.
Vasili tha se Rama po përdor këtë situatë për të shtyrë ditët e tij politike, pasi shqiptarët tashmë e kanë kuptuar se çfarë po ndodh.
“Përdori një strategji anti-shkencore, duke mbyllur farmacitë dhe bizneset, por lejoi fadromat e oligarkëve të punonin pa pushim.
Ka ardhur koha të ndahemi njëherë e mirë nga kjo qeveri abuzive, që shpërdoron besimin e qytetarëve.
Kurba e sheshtë dhe kufizimet prej 8 javësh nuk qëndrojnë bashkarisht. Nëse keni të dhëna të tjera, që nuk i bëni publike, por i fshihni, atëherë publikojini sot dhe justifikoni kufizimet”, tha Vasili.
Sipas tij, kufizimet e tmerrshme në këto 8 javë u përdorën nga Qeveria për të mos lejuar qytetarët që të kërkojnë llogari, pasi Kryeministri nuk ka pasur asnjë strategji.
“Për disa ditë më shumë në pushtet, Rama është i gatshëm që të sakrifikojë gjithçka, edhe jetët e qytetarëve”, tha Vasili.
