Nga Boldnews.al
Kryeministri Edi Rama është më komod se në çdo kohë politike të tij në këto ditë. Njerëzit i ka mbyllur tufa-tufa nëpër shtëpi. Qytetarët i nxjerr me orar e me ditë të caktuara për shëtitje, ashtu si kërcimet në dasëm: “Tani e kanë radhën pensionistët; pas tyre nënat me fëmijë deri në dhjetë vjeç…”..
I ka ecur ky eksperiment i madh social, duke bombarduar mendjet e njerëzve me teori të “luftës imagjinare” me avionë që bombardojnë, vdekje, arkivolë, varre të pafundme dhe ai që shfaqet si “shpëtimtar i jetëve njerëzore”. Por kjo mund të ngjisë në mendjet e turbulluara për disa kohë, po më pas?
Bizneseve u ofron një kockë sa për të lëpirë diçka, ndërsa vetë jep “mend” nga kështjella në Kodrat e Surrelit, duke bërë mjekun, policin, shoferin, veterinerin, parukierin apo ekspertin e madh të ekonomisë dhe politikës rajonale, e përtej rajonales. Sërish i ka ecur edhe kjo marrinë! Po deri kur? Një Shqipëri më virtuale se kaq nuk mund të gjente.
Ai po ecën me parimin që njerëzia po e ha mjatueshëm propagandën e tij, duke krijuar halucinacione se ai do të shpallet hero në fundin e kësaj pandemie. Mendon se qytetarët do i bëjnë duva e do e mbysin me urimet: “tu bëftë dita 1000, të rrosh përjetë që na shpëtove nga vdekja”. Edhe pse mund të duket deri në abubsurd infinit, këtë kryeministri ynë pretendon se do e kthejë në realitet.
Ka nxjerrë në treg edhe idenë se të gjithë duhet të sakrifikojnë, duke filluar nga ai vetë dhe këta miliarderë politikanë të Rilindjes, të cilët kanë përgjysmuar pagat e tyre, atë pagë që e tërhiqnin vetëm për të mos krijuar dyshime. Kush politikan në pushtet sot mbahet nga paga? Nodoshta Ilir Beqja, që dy ditë më parë si një “ekspert ekonomie” shtroi idenë se pagat në sektorin publik duhet të ulen, madje duhet të preken edhe pensionet. “Të sakrifikojmë të gjithë” -tha ai.
E artikuluar nga ish-ministri i Shëndetësisë që për katër vite u mbajt si “simboli i korrupsionit”, kjo më shumë se urrejtje ngjall neveri. Për biznesin Rama thotë që të “shesin shtëpitë e dyta, të treta, apo jahtet luksoze” dhe të paguajnë punëtorët. Dhe vetë biznesi ul kokë dhe nuk reagon, vetëm ankohet, kërkon por nuk merr, përulet para pushtetit dhe bie në gjunjë përballë kryeministrit.
Ata sot kanë frikë të flasin hapur, sepse në një mënyrë apo një tjetër e kanë lënë veten të nënshtruar, me përjashtim të një grushti të vogël oligarkësh që në kohën e pandemisë së koronavirusit po shtojnë në llogaritë e tyre fitime të mëdha.
Të gjithë janë në një luftë të madhe se kush do të mbijetojë valës së koronavirusit, jo në aspektin shëndetësor, por mbi të gjitha atë ekonomik. Qytetarët mendojnë për ushqimin e përditshëm, biznesi i ndershëm sesi të mbajë në këmbë atë që ka ngritur, oligarkët si të shtojnë edhe më shumë pasurinë, ndërsa pulitika në pushtet si të shtojë vitet e saj në mirëqenie, korrupsion dhe mbi të gjitha po shpik ide të reja të propagandës. Kush nga kjo kategori do e pësojë më shumë! Qytetarët e thjesht deri tani po mjaftohen me “tallavanë” e kreut të qeverisë!
