Kryeministri Edi Rama ka zgjedhur t´i përgjigjet akuzave të opozitës mbi tenderat sekretë dhe abuzimeve me çmimet përmes një video-montazhi, që e ka publikuar në rrjetet sociale.
Rama i ka konsideruar të gjitha akuzat si të pavërteta, ndërsa shprehet se nuk ka pasur asnjë tender sekret.
“Nëse do të ishin tendera sekretë, ato nuk do të ishin publikë. Të gjithë tenderat janë të bazuar në ligj”, thuhet ndër të tjera në videon e publikuar nga Rama, ku përfshihen akuzat e hedhura nga opozita lidhur me çmimet për blerjen e maskave, veshjes mbrojtëse për mjekët dhe infermierët, kitet, si dhe tenderi i ushqimeve prej 1.5 mln euro, ku fituese u shpall një kompani maqedonase.
Por sipas Ramës, të gjitha akuzat nuk janë të vërteta. Në videon e publikuar se tenderi për ushqimet nuk është 1.5 mln euro, por 830 mijë euro, ndërsa firma fituese është një nga më të mëdhatë në Maqedoninë e Veriut.
Gjithashtu Rama konsideron si të pavërteta deklaratat e opozitës dhe denoncimet lidhur me çmimet e aplikuara për blerjen e maskave, syzeve mbrotëse, veshjeve dhe kiteve.
Reagimet e Kryeministrit vijnë pak ditë pasi nga opozita ka pasur edhe një tjetër akuzë, që po rregullohen letrat e këtyre tenderave sekretë në katin e 3-të të Kryeministrisë.
“Mirëmëngjes Çfarë sekreti ka këtu?! Nuk ka tendera sekretë, as kontrata sekrete. Procedurat e tenderimit të përdorura për COVID-19 janë procedura të miratuara ligjore, për lidhjen e kontratave që diktohen nga interesat thelbësore të shtetit. Po të ishin sekrete nuk do të ishin publike.”, tha Rama.
Po ashtu në video është shkëputur edhe një deklaratë e Abielajt, i cili thekson në emër të PD-së se maskat mbrojtëse qeveria i ka blerë me një shifër 6.5 euro.
Ndërkohë, Rama i përgjigjet kësaj akuze me një formë ironie, ndërsa shton; “Me vërte?! Maskat mbrojtëse FFP2 janë blerë me 4.14 euro. Boll! 7X7 nuk bëjnë 42”
