Ministria e Shëndetësisë përditësoi sot të dhënat mbi rastet e reja me Covid-19 në Shqipëri. Një nga 34 rastet e zbuluara ishte në Berat, ku mësohet se e infektuara është një 16-vjeçare.
Ajo është banore e Kostrenit, dhe ka pasur ditët e fundit temperaturë dhe kollë, dy nga shenjat e koronavirusit.
Mësohet se 16-vjeçarja ishte e vetëizoluar dhe pasi i është nënshtruar testit ka rezultuar pozitive.
Nuk dihet ende se si adoleshentja është infektuar, ndërsa ka nisur hetimi epidemiologjik lidhur me rastin.
Ndërkohë në Mat pacientja e parë në këtë zonë është një 15-vjeçare, e cila jeton në një fshat bashkë me babain e saj.
Dyshimet janë se ajo ka vizituar nënën e saj në Fushë-Krujë, 10 ditë më parë, çka duket se përbën edhe dyshimin kryesor të infektimit.
Sipas të dhënave zyrtare nga Ministria e Shëndetësisë në Berat janë 3 raste me Covid-19, ndërkohë që në Mat është rasti i parë.
Numri total i të prekurve në Shqipëri është 712, nga të cilët 403 janë shëruar. Ndërkohë që jetën e kanë humbur 27 persona.
