Që prej futjes së vendit në karantinë, numri i krimeve pati rënie të ndjeshme, por natën e sotme pati një rikthim të tyre. Tre ngjarje njëra pas tjetrës. Në tre ngjarje kemi një viktimë dhe dy të plagosur. Ky bilanc, në vetëm 60 minuta.
Krimi i parë u shënua në Korçë, ku një burrë 67 vjeç u gjet nga bashkëshorja i gjakosur para banesës, por fatkeqësisht ndërroi jetë në spital. Ende nuk dihet si ka ndodhur ngjarja, por policia bën me dije vetëm se është qëlluar me mjet prerës.
Burime për mediat thonë se viktima Petrika Treska, u sulmua nga dy persona ende të paidentifikuar, ndërsa policia nuk bën të ditura detaje rreth këtij krimi. Këta të fundit deklarojnë se kanë nisur hetimet.
***
Ngjarja e dytë u shënua fill pas të parës. Këtë herë në Laç, ku 19-vjeçari H.Gj., u vetëplagos me armë zjarri në banesë. Ai u nis me urgjencë drejt Spitalit të Traumës në kryeqytet, dhe fatmirësisht ndodhet jashtë rrezikut për jetën.
***
Ngjarja e tretë, menjëherë pas të dytës ndodhi në Tropojë. Një person u plagos me thikë. Burime për Boldnews.al bëjnë me dije 36-vjeçari Sami Marticamaj, u transportua drejt Spitalit të Tropojës për t’u mjekuar.
Lidhur me këtë ngjarje policia ka shoqëruar disa persona. Dyshohet se i riu u plagos pas një sherri me disa persona për motive ende të paqarta pranë një lokali në Tropojë.
