Muaji i shenjtë i Ramazanit do të nisë me 24 prill. Pandemia e koronavirusit nuk do të lejojë që besimtarët të mblidhen për të kryer ritualet e zakonshme pasi mund të rrezikohen që të përhapin sëmundjen.
Kleriku mysliman, Gazmend Aga ka folur rreth përgatitjeve të besimtarëve myslimanë duke thënë se pandemia nuk do e ndalë agjërimin.
Në një lidhje të drejtpërdrejtë për Euronews Albania nga SHBA, Aga tha:
“Jo vetëm muaji i Ramazanit, por e gjithë kjo kohë nuk ka qenë e lehtë për të gjithë besimtarët, për të gjithë njerëzit. Megjithatë tashmë u bënë rreth 3 muaj që njerëzit po mësohen me stilin e ri të jetesës. Besimi është një pjesë e rëndësishme për shumë njerëz, sidomos muaji i Ramazanit, i cili do të jetë shumë ndryshe nga të gjithë vitet e tjera. Megjithatë ajo që ka rëndësi është se duke ruajtur shëndetin, duke ruajtur njëri-tjetrin, ta kthejmë këtë atmosferë në dobi të të gjithë njerëzimit, por edhe të gjithë besimtarëve. Është shumë e vështirë për një besimtar që të kalojë një muaj Ramazani larg njerëzve, larg tryezave me shumë të afërm, larg njerëzve në nevojë fizikisht. Megjithatë është shumë e rëndësishme për çdo besimtar kryerja e ritit të agjërimit, por gjithashtu të jetë pranë edhe të gjithë njerëzve në nevojë, gjithmonë duke ruajtur edhe distancën sociale”, tha Aga.
Kleriku mysliman foli për rëndësinë e lutjeve në grupe si dhe hodhi poshtë çdo mundësi që pengon besimtarët të agjërojnë si më parë.
“Janë disa rite ku tubimi është kusht prej zotit, ndërsa në disa rite të tjera tubimi nuk është kusht, megjithatë kuptohet që i gjithë shpirti i fesë, i gjithë shpirti i besimit, përveçse ka anën individuale ka edhe atë sociale e shoqërore. Megjithatë nuk është pengesë që një person, qoftë në punë ose jo, të vazhdojë agjërimin si më parë. I vetmi ndryshim është që faljet që bëhen çdo natë në xhami, këtë herë do të bëhen në shtëpi”, tregoi Aga.
Ai shprehet plot shpresë se sëmundja do të përfundojë dhe Bajrami që është me 30 dhe 31 korrik mund të na gjejë me festë të trefishtë.
“Kjo sëmundje nuk do të zgjasë përgjithmonë, edhe kjo do të mbarojë. Kush e di, për Bajram do të kemi mundësi të jetojmë një Bajram të trefishtë; Bajram që kemi mundur të agjërojmë muajin e Ramazanit, Bajram që do të bashkohemi së bashku dhe Bajram që do të ketë mbaruar edhe kjo sëmundje”, përfundoi kleriku.
Edhe vendi i shenjtë për besimtarët myslimanë, Meka, në Arabinë Saudite është mbyllur këtë periudhë, për të shmangur grumbullimet masive të njerëzve.
