Kryetari i PD, Lulzim Basha, tha se sot, 5 javë pas nisjes së krizës, qeveria vazhdon ende me improvizime, dhe nuk ka një plan, një strategji për menaxhimin dhe daljen nga situata.
Kreu i opozitës, tha se e vetmja mënyrë për të kuptuar gjendjen reale të pandemisë, është shtimi i testimeve. Rastet e reja me koronavirus, tha Basha, janë shqetësuese, dhe tregojnë se qeveria nuk ka asnjë plan apo metodologji se si do i përgjigjet kësaj, por thjesht vepron sot për sot.
Vetëm njohja reale e situatës, do të ndihmonte në pasjen e një strategjie për të luftuar virusin, po edhe për të lehtësuar krizën dhe afrimin e normalitetit.
Basha ka theksuar se qeveria duhet të luftojë koronavirusin, dhe jo njerëzit.
Sipas tij, paketa ekonomike, është më e vogla në rajon, më e pakët se e Kosovës.
Dhe teksa paketa e dytë nuk dihet ku është, tha Basha, nga e para, ende nuk kanë përfituar as 10 mijë persona.
Basha theksoi se ka të dhëna që shumë familje në ndihmë ekonomike, janë lënë jashtë skemës. Ai deklaroi me ton, se duhet transparencë nga qeveria për veprimet e saj.
