Kryeministri Edi Rama ka zhvilluar paraditen e sotme një takim me një grup maturantësh që kanë fituar të drejtën për të ndjekur studimet e larta.
Ndërsa dhjetëra maturantë protestonin para Kryeministrisë, Edi Rama duke mbrojtur kaosin e shkaktuar nga ministrja Lindita Nikolla ka takuar një grup maturantësh që kanë fituar të drejtën për të ndjekur studimet e larta.
“Nga më të mirët, jo vetëm që askush nuk ka mbetur jashtë, por ka fituar në të paktën 4 degë. Kjo është e vërteta kuptimplotë e faktit që kjo reformë, shumë e vonuar, e domosdoshme, kurajoze dhe shumë e vështirë për shkak të një sistemi të ndërtuar së prapthi, funksionon më së miri”, u justifikua Rama.
Dhe në vend që të sqaronte maturantët të cilët po protestojnë prej disa ditësh, Rama zgjodhi të tregonte histori me taksistë.
“Mbase e keni dëgjuar historinë. Kam një zakon të vjetër nga koha kur isha kryetar bashkie, një apo dy herë në vit dal natën i pashoqëruar, i iki edhe atyre të Gardës që se kuptojnë ku shkoj dhe marr një taksi. Kam shumë dëshirë të flas me njerëzit që janë shoferë taksish se ata janë barometri më i mirë.
Në një taksi mund të dëgjosh në dy orë gjithçka dhe mund të kuptosh më shumë se sa analistët dhe debatet, portalet. Shyqyr që s’po gjej më problemin që çdo taksixhi me master, me doktoratura, se e tregonin, i merrnin në natyrë, sot s’ka më të tilla dhe këto janë hapa shumë të rëndësishëm.
Sigurisht ju do thoni që ne duam më shumë, por koha është shumë e rëndësishme, siç ishte ndërtuar ky sistem që ne e kemi lënë pas, koha është jo aq e vogël sa hap e mbyll sytë”, tha Rama.
