Një urdhër nga Drejtoria e Përgjithshme e ISSH i është dërguar drejtorive rajonale, përmes të cilit kërkohen informacione të detajuara mbi punonjësit e këtij institucioni në rang vendi.
Në formën e një tabele, drejtuesit rajonalë, duhet të plotësojnë të dhënat mbi punonjësit që kanë në varësi, e specifikuar kjo në disa drejtime.
Nuk dihet sepse drejtoria e Përgjithshme e ISSH-së e drejtuar nga Astrit Hado kërkon informacione kaq të detajuara, aq më shumë në kohën kur prej 3 javësh vendi është përfshirë në një gjendje lufte, sikundër e quan Kryeministri Edi Rama, për shkak të pandemisë së Covid-19.
Në bazë të një emaili kërkohet informacion i detajuar për datën se kur kanë nisur punë punonjësit e ISSH, arsyet përse kanë filluar punë, por kërkohen informacione edhe kush i ka rekomanduar për të nisur punë, apo për të ndryshuar pozicione brenda institucionit.
Për këtë, formulari, nëse mund të cilësohet kështu, ka një rubrikë të veçantë, e cila duhet të plotësohet saktësisht se kush ka qenë personi që ka propozuar emrin e punonjësit për të filluar punë apo edhe për të ndryshuar pozicionin e punës.
I gjithë procesi ngjan me një evidentim të punonjësve, mbledhje informacionesh të detajuara, i ngjashëm me proceset e evidentimit të votuesve para një procesi elektoral.
Ndoshta, përmes një procesi të tillë, ISSH e drejtuar nga Hado, si dhe Ministria e Financave, mund të ndërmarrin largime masive nga puna të punonjësve të ISSH, në rast se në këtë institucion mund të ketë ende specialistë që nuk i përkasin PS-së, Rilindjes, apo nuk janë propozuar në këto vende pune me lista partie.
Kjo bazuar në faktin se informacioni që kërkohet për cdo punonjës të ISSH-së është aq shumë i detajuar sa duket se të gjithë punonjësit do të riemërohen nga fillimi në pozicionet e tyre të punës. Kështu kërkohet informacion për tipin e kontratës së emërimit ( Komandim, komandim me afat, emërim një vjecar apo emërim pa afat).
Gjithashtu informacion duhet të jepet edhe për datën e kërkesës së bërë nga punonjësi për tu punësuar apo lëvizjet brenda institucionit si dhe data e fillimit të punës dhe ajo e deklarimit si i punësuar pranë Drejtorisë së Tatimeve.
Nga ana tjetër kërkohet informacion edhe për shkresat e bëra brenda institucioneve për emërimin apo refuzimin e kandidaturave. Ndërsa kuadrati që ka bëjë me informacionin për arsyen e emërimit është edhe më i gjerë. Në këtë kuadrat duhet të përshkruhet qartësisht arsyeja e punësimit, lëvizjes së brendëshme apo emërimit.
Dhe i gjithë procesi ndodh në një kohë, kur nga Qeveria u është premtuar pensionistëve që të qëndrojnë në banesat e tyre dhe të mos dalin, pasi edhe pensionet do t´u dërgohen në shtëpi.
Por duket se vëmendja e drejtuesve të ISSH është tjetërkund, pastrimin e administratës, nga emra që mund të kenë shpëtuar ose janë harruar pa u larguar deri më tani.
Duket se pas këtij procesi, hapi i rradhës do të jetë punësimi i emrave që do të propozohen nga strukturat e PS-së, deputetë të saj apo drejtues të grupeve të punës. / Boldnews.al/
