Legjenda e futbollit shqiptar, Lorik Cana, aktualisht ndodhet në Itali ku po qëndron i izoluar për shkak të përhapjes së koronavirusit.
Ish-kapiteni i Shqipërisë, së fundmi ka dhënë një intervistë për “Fan Zone” në Supersport. Cana i është përgjigjur pyetjeve të ndryshme, ndërsa ka zbuluar dhe futbollistin më të talentuar me të cilin ka luajtur si dhe momentet më të veçanta në kombëtaren shqiptare.
Si po i kaloni këto ditë në izolim, pasi ndodheni në Romë dhe Italia është ndër vendet më të prekura?
Natyrisht që po rrimë brenda dhe kemi minimizuar lëvizjet. Këto ditë po i shfrytëzoj për të ndenjur më shumë me familjen dhe për t’u marrë më shumë edhe me djalin tim. Gjithashtu kam pasur kohë të mjaftueshme për të ndenjur në kontakt me familjarët, farefisin dhe rrethin miqësor. Kam ndihmuar shumë edhe djalin, për të bërë sa më shumë ushtrime, pasi ai ka një moshë, ku harxhimi i energjive është domosdoshmëri.
Po juve vetë jeni stërvitur?
Disi më pak. U bënë 4 vite që kam lënë futbollin dhe vetëm vitin e parë shtova 14 kg, të cilat i kam ende në trup, pavarësisht aktivitetit që kryej.
Babai juaj futbollist i njohur, juve gjithashtu. A besoni se edhe djali juaj do të ecë në këto hapa?
Babai ka bërë një karrierë brilante, duke u bërë i njohur në Kosovë e Shqipëri, ndërsa prej tij mora edhe unë shtysën e frymëzimin, për t’u marrë me futboll. Do të doja që edhe djali im të bënte karrierë në këtë sport, por është ende herët për të parë nëse ka të dhëna apo ka prirje për diçka tjetër.
Na thoni tre momentet më të veçanta tuajat në Kombëtaren Shqiptare…
Kam fiksuar vitin 2002, kur zhvillua një vëllazërore me Kosovën, ndeshjen në Zvicër ku edhe debutova në pjesën e dytë me fanellën kuqezi, si dhe ndeshjen me Armeninë, ku siguruam kualifikimin për në Kampionatin Europian.
Cili ka qenë lojtari shqiptar më i talentuar me të cilin keni pasur fatin të luani?
Unë kam pasur fatin të luaj me një gjeneratë futbollistësh mjaft të talentuar dhe e kam të vështirë të zgjedh vetëm një, por nëse duhet të them një emër, po zgjedh Ervin Skelën.
