Kryeministri Edi Rama deklaroi mbrëmjen e sotme në emisionin “Provokacja” se 60 % e shqiptarëve ose e kanë marrë ose do e marrin koronavirusin, pasi virusi do të bëjë të vetën, nuk ndalet.
Rama tha se nuk i është nënshtruar testeve për koronavirusin, pasi mendon se ato duhet t´i nënshtrohen personat që kanë shenja të infektimit.
“Jemi të parët që morëm masat ekstreme, duke mbyllur shkollat dhe universitetet, me synim shmangien e katastrofës”, tha Rama, duke shtuar se një nga ekspertët në një studio televizive tha se skenari më i keq nëse nuk do të merrnim masat ishte me 18 mijë viktima.
“Ne s´kemi luksin për kaq viktima, madje as për qindra dhe jo më për mijëra. Ka pasur njerëz që kanë qenë kundër masave të tilla, por ne i morën dhe nuk jam penduar, pasi kemi shpëtuar jetë njerëzish”, tha Rama.
Ai tha se marja e masave ka qenë e maturuar dhe pavarësisht vështirësive që ka krijuar te disa familje, kanë qenë të domosdoshme.
“Nëse nuk do të vinim masat dhe do të kishte lehtësim të kontakteve, atëherë do të krijohej një masë kritike që nuk do të mund të përballohej nga sistemi shëndetësor, pasi nevojat për respiratorë do të ishin shumë më të mëdha sesa numri i tyre”, tha Rama.
