Nga Boldnews.al
Prej të paktën dy javësh Shqipëria dhe qytetarët e saj ndodhen nën ankthin e Covid 19, pandemisë botërore që ka shkaktuar mbi 14 mijë viktima në gjithë Botën, 5 nga të cilat në Infektivin e Tiranës.
Një pandemi që kapi të papërgatitur disa nga vendet, ndërsa të tjera kishin mundësinë që të merrnin masa dhe deri diku të ishin të përgatitura.
Fatmirësisht Shqipëria dhe disa nga vendet e Rajonit patën një kohë të mjaftueshme për t´u përgatitur, brenda mundësive të tyre, por kohën e vyer e shpërdoruan.
Me apo pa vetëdije, kjo ndodhi edhe në Shqipëri, ndërkohë që Covid 19 nisi përhapjen në Itali.
Ishte fundi i shkurtit, kur Kryeministri Edi Rama që sot i ka vendosur vetes gradat e gjeneralit në luftën me armikun e “padukshëm”, tallej dhe sulmonte mediat lidhur me rrezikun që i kanosej vendit të vogël, fqinj me Italinë, ku koronavirusi sot e ka gjunjëzuar.
Nuk është e vështirë të gjesh deklaratat e Ramës, i cili median e quante kazan, ndërsa në pikat e kalimit kufitar dhuronte shoë me disa ekipe mjekësore që me termometër në duar masnin temperaturën e çdo personi që hynte në territorin shqiptar.
“Koronavirusi nuk e ka prekur Shqipërinë! Por si për gjithë botën është një kërcënim potencial, për të cilin janë marrë të gjitha masat në rast se do të na duhet ta përballim
Të njëjtat mendje të shthurrura, që ju shqetësuan keq me lajmet fallco dhe me gojëligësinë e tyre gjatë ditëve e netëve të gjata pas tërmetit, janë në veprim.
Mos bini pre e tyre dhe jini të sigurt se shteti shqiptar po e bën prej kohësh detyrën për të qenë gati në rast shfaqjeje të koronavirusit, të cilin jemi gati ta përballim me organizim e profesionalizëm të lartë”, shprehej Rama javën e fundit të muajit shkurt.
Pra ishte i ndërgjegjshëm për rrezikun e virusit, por sërisht e merrte me shaka, ndoshta nga padija, ose nga besimi i tepruar në forcat e Rilindjes.
Dhe fatkeqësisht pas Ramës dhe deklaratave të tij, deri cinike, shfaqeshin një grup mjekësh, disa prej të cilëve edhe vetë ndoshta nuk i besonin ato që thonin, duke i mbushur mendjen njerëzve se koronavirusi ishte thjesht një grip.
Kishte disa të tjerë që nisën të besonin se rakia, hudhra, qepa, kishin krijuar imunitet te shqiptarët, që do të mbeteshin të paprekur, ose të tjerë që fatkeqësisht kishin role drejtuese në sistemin shëndetësor, që tregonin përralla se shqiptarët në Itali nuk ishin të prekur, pasi kishin imunitet meqë të parët e tyre kishin kaluar pandeminë e kolerës.
Në këtë mënyrë u krijua një orkestër, ku Rama i binte fyellit i pari, dhe pas tij dëgjoheshin disa “fyej” që i mbanin ison “gjeneralit të sotëm”.
Dhe kur e gjithë koha e nevojshme mund të shërbente për t´u përgatitur, Qeveria në Tiranë e shpërdoronte atë.
E mbani mend Kryeministrin kur deklaronte se OBSH nuk përkrahte mbylljen e kufinjve, strategji që doli jo vetëm e dështuar, por u kalua jo vetëm në mbyllje kufijsh por edhe mbylljen e njerëzve nëpër shtëpi.
Apo kur shpenzonte kohën me maskat nëse ishin ose jo funksionale kur ishin të skaduara, ndërkohë që fare mire mund t´a harxhonte për një strategji, jo si kjo e miratuar nën panik dhe frikë.
E ndërsa sipas shifrave në territorin shqiptar hynë të paktën 120 mijë persona, një pjesë e të cilëve nga vende ku virusi kishte përhapje, gjithçka u la në ndërgjegjen e tyre, pa masa kontrolli, pa karantinime, duke i kthyer të infektuarit në “bomba” të vogla për shoqërinë.
Brenda pak ditësh situata ndryshoi, dhe në media u shfaq një tjetër Edi Ramë, këtë rradhë i trembur, pavarësisht se vazhdimisht thoshte dhe thotë “frikë jo, kujdes Po”.
Një Ramë që nga personi që tallej dhe sulmonte, duke përdorur të njëjtin fjalor fyes ndaj ato që i klasifikon si “armiq të dukshëm” (media dhe opozita), u shndërrua në një Ramë që kërcënonte dhe deri diku u kthye në burimin kryesor të përhapjes së panikut.
Nën presionin e frikës, i mbyllur në banesën e tij në Surrel, që i ngjan një bunkeri, nisi lëshimi i urdhërave, pasi më parë i shpalli luftën armikut të padukshëm.
Kjo ishte faza që duket se kuptoi se ky armiku i padukshëm nuk ishte një shaka, as i shpikur nga “armiqtë e tij të brendshëm dhe të dukshëm”, por ishte një rrezik, që me kushtet e shëndetësisë shqiptare, e 10 fishon forcën e tij.
Brenda ditës urdhërat ndryshoheshin disa herë, aq sa u krijua një çorientim, jo vetëm me oraret e lëvizjes, por edhe me atë se çfarë lejohej ose jo.
Dhe nën panik, vendosi të nxjerrë në rrugë ushtrinë, blindat e pajisura me armë zjarri, më pas ashpërsoi gjobat, më pas publikonte video mbi atë se çfarë do t´I gjente ata që do të shkelnin rregullat e caktuara nga “gjenerali suprem” i luftës me koronavirusin.
Të gjitha këto masa i nxorri brenda pak ditësh, ndërkohë që në pjesën e vyer të kohës së humbur, e shpërdoroi me akuza ndaj mediave, opozitës, dhe gjithkujt tjetër që përpiqej t´a merrte me pak seriozitet atë që nisi në Kinë dhe u shpërnda në Itali dhe më pas në Europë.
Askush nuk e pengoi “Gjeneral Ramën” që ato që hynin nga “zonat e kuqe” të mbaheshin nën kontroll, të pabindurit edhe t´i izolonte me detyrim dhe hapësirat nuk i mungonin. Por jo, atëherë e kishte mendjen të tallej, të ironizonte, t´a merrte me shaka, ndërsa sot kërcënon “të papërgjegjshmit” me polici e blinda.
Fatkeqësisht u desh ky virus që të njiheshin dy gjendjet emocionale të Edi Ramës, atë të cinikut dhe të papërgjegjshmit, në njërën anë, dhe atë të frikacakut dhe shtetarit pa ide, që mendon se “armikun e padukshëm” mund t´a asgjesojë me mitrolozët e vendosur mbi blindat e ushtrisë.
