Kryeministri Edi Rama ka prezantuar mbrëmjen e sotme planin për ekonominë në kohën kur vendi është prekur nga virusi i rrezikshëm COVID-19 që ka detyruar qeverinë të marrë masa drastike.
Rama tha me shifra se sa do të jenë fondet për Ministrinë e Shëndetësisë, kompanitë, Ministrinë e Mbrojtjes etj.
Nga ana tjetër ai tha se ministrat e deputetët do të marrin gjysmën e pagës deri sa të përfundojë kjo situatë, ndërkohë që vlerësoi angazhimin e Presidentit Ilir Meta.
Pjesë nga fjala e Ramës:
Unë në fakt doja që qysh në planin të imponoja heqjen e diçkaje nga vetja për ata që fitojnë më shumë në sektorin privat apo ata me pagë të lartë por më bindën që do tingëllonte e gabuar.
Ndaj nuk do prekim hë për hë asnjë pagë përveç anëtarëve të km dhe deputetëve, të cilët do marrin gjysmën e rrogës. Nuk dua t’i hyj në hak presidentit të Republikës që ka ndihmuar në këtë situatë.
Plani ynë për adresimin e nevojave për financim të atyre që janë prekur ka këto 7 pika:
1. 2.5 mld lekë për luftë në vijën e zjarrit për Ministrinë e Shëndetësisë.
2. 10 mld lekë për kompanitë që kanë vështirësi objektive për të paguar pagat e punonjësve.
3. 6.5 mld lekë për nevojat më imediate për shtresat në nevojë, biznesin e vogël, papunësinë e mundshme.
4. 2 mld lekë për Ministrinë e Mbrojtjes për operacionin humanitar.
5. 1 mld lekë për fond rezervë për Këshillin e Ministrave për çdo urgjencë të paparashikuar.
6. Do të fshijmë kamatvonesat për debitorët aktivë që kanë konsum energjie sot, familjarë apo biznes i vogël, me efekt financiar deri ne 15 miliardë lekë ose 150 mln dollarë: Përfitojnë 211024 abonentë.
7. Do riskedulojmë tatim-fitimin për biznesin deri në fashën nga 2 në 14 mln lekë, ose nga 20 deri në 140 mijë dollarë xhiro.
