Qendra e Tiranës është bllokuar mëngjesin e sotëm pa asnjë njoftim paraprak. Bashkia e Tiranës duket se do të fillojë projektin për ndërtimin e parkingut nëntokësor të sheshit Skënderbej.
Projekt i cili u publikua para një muaji nga Kryeministri Edi Rama në faqen e tij zyrtare në Facebook, ku publikoi disa foto të një parkingu me përmasa të mëdha betoni por pa dhënë asnjë informacion tjetër, as për datën e fillimit dhe asnjë detaj tjetër.
Mëngjesin e sotëm Boldneës.al zbulon se qendra e Tiranës është bllokuar me anë të një tabele ku shkruhet: Kujdes! Punime ne rrugë. Ju kërkojmë ndjesë për shqetësimin! Këto punime tregojnë se sot fillon ndërtimi i parkingut.
Projekti i mëparshëm i prezantuar për sheshin Skënderbej nuk parashikonte një parking të tillë dhe nuk dihet nga doli ideja e projektit pasi ai nuk është përfshirë as në masterplanin e Tiranës. Këtë të fundit bashkia po bën sikur po e diskuton në publik pa respektuar asnjë procedurë të parashikuar për dëgjesat publike.
Nuk dihet kush, si dhe me çfarë procedure e projektoi projektin, që duket se është bërë në fshehtësi, duke shkelur çdo procedurë ligjore; nuk dihet kur dhe si është miratuar projekti.
Nuk dihet a është diskutuar me ekspertët dhe me publikun, që me gjasa nuk ka ndodhur.
Nuk dihet projekti teknik i sheshit, shtrirja, thellësia, kapaciteti; nuk dihet çfarë do përmbajë veç vendeve të parkimit; nuk dihet kostoja e tij; nuk dihet si do ndërtohet dhe si do operohet.
Ne vetëm mund të marrim me mend se projekti është projektuar nga ndonjë prej studiove të zakonshme që përfiton tenderat e qeverisë dhe Bashkisë Tiranë dhe do të ndërtohet apo administrohet me koncesion, nga ndonjë nga firmat e zakonshme që përfiton koncesione dhe kontrata publike nga qeveria apo bashkia Tiranë.
Sidoqoftë, ndërtimi i parkingut nën Sheshin Skënderbej, ngre një sërë pikëpyetjesh thelbësore:
• Një nga arsyet kryesore të bllokimit dhe kthimit të sheshit në zonë për këmbësorët që kishte propaganduar qeveria ishte çkurajimi i përdorimt të makinave. Ngritja e këtij parkimi nëntokësor do të thotë që qeveria nuk e ka këtë qëllim pasi parkimin nën Sheshin Skënderbej do t’i bëjë që edhe ata që vizitojnë sheshin mund të vinë me makinë deri aty dhe të parkojnë. A nuk bie ndesh me gjithë logjikën e mbylljes së qendrës së Tiranës ky projekt?
• Nëse qeveria do harxhojë miliona euro për një parkim nën shesh që nuk do të çkurajojë përdorimin e makinave, pse nuk ndërton më mirë një nënkalim nëntokësor në shesh që nuk e ndërpret trafikun? Një zgjidhje e tillë kushton më pak dhe shmangë problemet e trafikut dhe kostot e mëdha që do krijohen, të cilat projekti i sheshit të rindërtuar nuk i ka trajtuar e nuk u ka dhënë zgjidhje.
• Pse qeveria nuk i investon paratë e ndërtimit të parkimit nëntokësor për përmirësimin rrënjësor të transportit urban që do të ulë vërtet trafikun e makinave dhe ndotjen prej tij dhe do të nxisë me të vërtetë mjetet alternative të transportit?
• Cila është logjika ekonomike, teknike dhe urbane e kthimit të të gjithë qendrës së Tiranës në një parkim të madh nëntokësor: në Sheshin Skënderbej, Parkun Rinia dhe Sheshin Italia para stadiumit të ri dhe në pjesën pas stadiumit të ri?
• Si mund të kthehet e gjithë qendra e Tiranës në parkime nëntokësore të cilat me hyrjet dhe daljet e tyre do të shkatërrojnë çdo element estetik të pjesës të saj duke e shndërruar atë si në një zonë industriale apo periferike urbane?
Trajtimi i qyetarëve në mënyrë përçmuese si ajo e njoftimit të tyre me një mesazh banal dhe tallës në Facebook për një projekt që ka ndikim të madh në të gjithë qytetin është formë e pastër e autokracisë dhe abuzimit të pushtetit. Hartimi i këtij projekti është bërë në dhunim të hapur të ligjit dhe në shkelje të të drejtave kushtetuese dhe ligjore të qytetarëve.
Ky projekt është një tjetër shembull që tregon se qeverisja në Shqipëri është shndërruar në një autokraci kryeministrore në shërbim të një grupi klientësh dhe në dhunim të ligjeve, të drejtave dhe interesit të publikut.
